ادبي پڪوڙا ؛ “خرچي وٺڻ آيو آهيان،فتويٰ پڇڻ نه!”

عباسي خليفو مامون الرشيد خراسان کان حج ڪرڻ جي نيت سان مڪي شريف وڃي رهيو هو.طوس جي هنڌ تي کيس هڪڙو شخص مليو جيڪو چوڻ لڳو؛

“ اي اميرالمومنين! آئون بدو آهيان”

مامون الرشيد اهو ٻڌي چوڻ لڳو؛

“ ان ۾ ڪا حيرت جي ڳالهه نه آهي.”

اهو ٻڌي اهو شخص چوڻ لڳو ؛

“ آئون حج ڪرڻ لاء وڃڻ چاهيان ٿو.”

مامون چيو؛ “ اللھ جي زمين ڪشادي آهي، وڏي خوشيء سان حج ڪرڻ وڃ.”

ان تي بدو چوڻ لڳو؛ “ پر مون وٽ سفر جو خرچ ڪونهي.”

مامون چوڻ لڳو ؛ “ پوء ته توتي حج به فرض ڪونهي.”

بدو چوڻ لڳو؛ “ اميرالمومنين ! آئون اوهان کان ڪجھه خرچي وٺڻ آيو آهيان،فتويٰ پڇڻ نه!”

ان تي مامون الرشيد کلي پيو ۽ کيس موچارو انعام ڏيڻ جو حڪم ڏنائين.