ڪورونا خلاف جنگ ۽ اسرائيلي موساد.

شفيق الرحمان شاڪر

اسان جي ملڪ ۾ بدقسمتيء سان ڪورونا جهڙي سنگين مسئلي تي به سياسي جنگ هلي رهي آهي ۽ هڪڙا ادارا يا حڪومتي عهديدار ٻين تي الزام مڙهي رهيا آهن پر دنيا جون قومون وبائن جو مقابلو ڪيتري سنجيدگي ۽ سچائيء سان ڪن ٿيون ان جو اندازو هڪ نيوز اسٽوري مان لڳائي سگھجي ٿو جيڪا ڪجهه ڏينهن اڳ اسرائيلي جاسوس اداري موساد جي باري ۾” نيويارڪ ٽائيمز“ ۾ ڇپي آهي

هلندڙ مهيني جي شروع ۾ جڏهن اسرائيل جي وزير صحت کي ڪورونا وائرس جو مريض ظاهر ڪيو ويو هو ته ان سان ويجھا لاڳاپا رکندڙ سمورن اعليٰ سطحي عملدارن کي به ڪورنٽائين ڪيو ويو جن ۾ اسرائيلي جاسوس اداري ”موساد“ جو ڊائريڪٽر به شامل هو.هونئن ته اهو جاسوس ادارو اسرائيل کان ٻاهر اسرائيل جي سلامتيء جي حوالي سان سرگرم رهندو ٿو اچي ۽ ظاهر ۾ ان جو ملڪ اندر ماڻهن جي صحت جي حوالي سان ڪو تعلق ۽ واسطو نه آهي پر موساد جي ڊائريڪٽر ”يوسي ڪوهن “ جي اسرائيل جي وزير صحت سان هڪ ڪمري ۾ گڏ رهڻ ڪيترائي سوال ضرور پيدا ڪيا آهن.اسرائيل جي طبي ۽ سيڪيورٽي عهديدارن موجب ڪوهن جي طاقتور ايجنسي موساد وڏي پيماني تي ملڪ ۾ پکڙجندڙ ڪورونا وائرس واري جنگ ۾ اهم ڪردار ادا ڪيو آهي ۽ ٻاهرين ملڪن مان طبي ساز سامان ۽ مينوفيڪچرنگ ٽيڪنالاجي حاصل ڪرڻ ۾ ان ايجنسي نهايت ئي گھڻي محنت ڪئي آهي.جيئن ته پوري دنيا جا ملڪ وبائي مرض دوران ان سامان جي محدود فراهميء سبب جڏهن پاڻ به سخت ضرورت واري صورتحال جو شڪار هجن ته اهي ڪنهن ٻئي ملڪ جي ضرورت پوري ڪرڻ جي پوزيشن ۾ نه هوندا آهن.موساد جنهن کي پڪ آهي ته ايران جيڪو هن وقت پاڻ ان وبا ۽ معاشي پابندين سبب بي حال بڻيل آهي اهو في الحال اسرائيل لاء ڪو خطرو نه رهيو آهي.انهيء ڪري موساد وٽ هن وقت اهو موقعو آهي ته اها پنهنجي ملڪ ۾ ان وبا جو مقابلو ڪرڻ لاء پنهنجو سمورو ڌيان ان طرف کپائي ملڪ کي ان ڌٻڻ مان ٻاهر ڪڍي.

اسرائيل ۾ وائرس پکڙجڻ جي حوالي سان شروعاتي اڳڪٿيون نهايت ئي ڊيڄاريندڙ هيون پر اڃا تائين صورتحال ايتري خراب ڪانهي.هن وقت تائين اسرائيل ۾ وائرس جا اٽڪل 11000 ڪيس سامهون آيا آهن ۽ اٽڪل 103 ماڻهو مئا آهن.ان ڪري اسرائيل ان وبا جي حوالي سان سنگين صورتحال کي منهن ڏيندڙ ملڪن ۾ شامل ناهي.تل ابيب يونيورسٽيء جي پروفيسر اسحاق بين اسرائيل پاران لکيل هڪ مضمون ۾ چيو آهي ته ” ان وبا جي آخري حد ٻن هفتن کان اسان جي پويان آهي ۽ اها ٻن هفتن اندر پوريء طرح ختم ٿي ويندي.“ پر فيبروريء جي شروع ۾ اسرائيل جي سڀ کان وڏي اسپتال شيبا ميڊيڪل سينٽر جي عملدارن کي احساس ٿيو ته انهن کي تمام گھڻن وينٽيليٽرز ۽ ٻئي طبي سامان جي گھرج آهي.ان وقت اسپتال جي ڊائريڪٽر جنرل پروفيسر يتشڪ ڪريس موساد جي چيف سان ملاقات ڪئي.مسٽر ڪوهن پهرين ئي سوچي رهيو هو ته موساد اسرائيلي ماڻهن جي صحت جي معاملي ۾ ڪيئن مدد ڪري سگھي ٿي.پروفيسر ڪريس جي چوڻ مطابق هن ڪوهن کي نهايت ئي ضروري سامان جي لسٽ ڏني ۽ موساد اهي شيون ڪنهن به قيمت تي حاصل ڪرڻ لاء پوري دنيا ۾ موجود پنهنجي نيٽ ورڪ کي سرگرم ڪري ڇڏيو.مارچ جي شروع ۾ پوري ملڪ ۾ طبي سامان ورهائڻ لاء هڪ ڪمانڊ ۽ ڪنٽرول سينٽر قائم ڪيو ويو جنهنجو سربراهه موساد جي ڊائريڪٽر ڪوهن کي مقرر ڪيو ويو.انهيء ۾ موساد سواء بچاء واري وزارت جي خريداري ڊويزن ۽ فوجي انٽيليجنس جي نهايت ئي خفيه يونٽ 81 جا نمائندا شامل هئا.

پروفيسر ڪريس جيڪو اسرائيلي فوج ۾ برگيڊر جنرل ۽ سول سرجن به رهي چڪو آهي ان ٻڌايو ته موساد ٻاهرين ملڪن مان ضروري طبي سامان ۽ مهارت حاصل ڪرڻ ۾ اسان جي پوريء طرح مدد ڪري رهي آهي.پروفيسر ڪريس اهو قطعي طور تي ٻڌائڻ کان انڪار ڪيو ته موساد جي آفيسرن اسرائيلي ميڊيڪل اسٽيبلشمينٽ جي ڪهڙيء طرح مدد ڪئي يا ٻاهران سامان ڪٿان ڪٿان آيو؟پر موساد جي ڪاروائين کان واقف ڪجهه هاڻوڪن ۽ اڳوڻن عملدارن مطابق ان ايجنسيء سامان جي ان کوٽ کي دور ڪرڻ لاء پنهنجن بين الاقوامي لاڳاپن جو ڀرپور استعمال ڪيونه ته اسرائيل جو صحت وارو شعبو هن وقت تائين ويهي چڪو هجي ها.اهي عملدار اها تصديق نٿا ڪن ته موساد ڪجهه سامان انهن عرب ملڪن کان به حاصل ڪيو جن جا ظاهر ۾ اسرائيل سان سفارتي ناتا موجود ناهن.تنهن هوندي به هڪ ٽي وي انٽرويو ۾ موساد جي هڪ سينيئر عملدار تسليم ڪيو ته موساد اهڙو سامان به حاصل ڪرڻ ۾ ڪامياب ويو جنهنجو آرڊر اڳ ۾ ئي ٻين حڪومت ڏيئي رکيو هو. اپريل جي پهرئين هفتي ختم ٿيڻ تائين ڪوهن کي پڪ هئي ته اسرائيل کي گھربل طبي سامان خاص طور تي وينٽيليٽرز جي کوٽ پوري ڪرڻ لاء موساد تسلي بخش ڪم ڪري چڪي آهي.

ڪنهن حد تائين موساد جي وبائي بيمارين جي حوالي سان ملڪي معاملن ۾ مداخلت وزرات صحت جي عهديدارن لاء پشيمانيء جو سبب به بڻي آهي جيڪي ميڊيا تي عام طور تي آزاديء سان ڳالهائين ٿا پر ان معاملي ۾ جاسوس اداري جي ڪردارتي ڪوبه تبصرو نٿا ڪن.وزير اعظم جي آفيس جي هڪ عهديدار موجب موساد ذريعي ٻاهرين ملڪن مان حاصل ڪيل سامان جي پهرين کيپ 19 مارچ هڪ خاص اڏام ذريعي اسرائيل پهتي هئي.ان کان پوء پهتل سامان ۾ وڌيڪ ٽيسٽ ڪٽس،15 لک طبي ماسڪ،طبي عملي لاء حفاظتي سامان ۽ دوائون وغيره شامل هيون.موساد ملڪ کان ٻاهران اهڙي ٽيڪنالاجي به حاصل ڪئي جنهن سان اسرائيل ۾ ٽيسٽ ڪرڻ جي صلاحيت وڌي ويئي.ايستائين جو موساد اسرائيل اندر وينٽيليٽرز تيار ڪرڻ جي ڄاڻ به حاصل ڪري ورتي.هڪ سينئر اسرائيلي عهديدار جي چوڻ مطابق موساد کي خبر هئي ته پوري دنيا ۾ ان سامان جي سخت گھرج پوندي ۽ ڪوبه ملڪ بعد ۾ اهو سامان مهيا نه ڪندو جنهن ڪري ان وقت کان اڳ ان جو بندوبست ڪري ورتو.ان عهديدار مطابق دنيا جي غير جمهوري حڪومتن سان ڊيل ڪرڻ ۾ موساد کي ڪا ڏکيائي پيش ناهي آئي جو انهن ملڪن جي خفيا ايجنسين سان موساد جا اڳ کان ئي مضبوط لاڳاپا موجود آهن.

ڪوهن ٻين ملڪن ۾ ذاتي طور تي پنهنجن هم منصبن سان رابطو ڪيو ۽ ڪجهه حڪمرانن سان سڌي سنئين ڳالهه ٻولهه پڻ ڪئي.جڏهن ٻين ملڪن ۾ به ان سامان جي گھرج وڌي ته مقابلو سخت ٿي ويو پر موساد جي ڪاروائين جي باري ۾ ڄاڻندڙن کي خبر آهي ته پنهنجن مقصدن کي هر قيمت تي حاصل ڪرڻ لاء موساد ڪهڙي گندي راند کيڏي سگھي ٿي.اهي به خبرون آهن ته مسٽر ڪوهن گڏيل عرب امارتن سان گڏوگڏ مصر،سعودي عرب،اردن ۽ قطر جي حڪمرانن سان به ملاقاتون ڪيون.تنهن هوندي به اسرائيل لاء ڪورونا وائرس خلاف سامان گڏ ڪرڻ ۾ ڪجهه هنڌن تي موساد ناڪام به ٿي آهي.مثال؛ جرمنيء ۾ جڏهن اهڙو سامان اسرائيل روانو ڪيو پئي ويو ته سرڪار اهو سامان کسي ورتو.اهڙيء طرح هندستان مان به ڪجهه سامان رولڙي جو شڪار ٿي ويو.بهرحال پڪ سان اسرائيلي شهري هڪ لڪيل دشمن سان ٿيندڙ جنگ ۾ پنهنجي هڪ جاسوس اداري جي ڪردار کي عزت جي نظر سان ڏسي رهيا آهن.

(روزاني عوامي آواز)